Jumaat, 26 Ogos 2016
Saboh riwayat narit lon peutroh
di Nanggro jioh keu saboh bangsa
jiduek lam uruek ji eh dalam broh
Keu Bangsa tikoh haba lon rika
di Nanggro jioh keu saboh bangsa
jiduek lam uruek ji eh dalam broh
Keu Bangsa tikoh haba lon rika
Tikoh dalam Blang atawa lampoh
Wajeb taparoh bek wahe sjedara
Glong jeuneurob tapageu lampoh
Taleet beu jioh bek lee ji teuka
Wajeb taparoh bek wahe sjedara
Glong jeuneurob tapageu lampoh
Taleet beu jioh bek lee ji teuka
Dilee kon udep di bangsa tikoh
Kayem jipiyoh lam uruek raya
Meuaneuk binoe sinan dalam broh
Hinan seumajoh pue-pue nyang hawa
Kayem jipiyoh lam uruek raya
Meuaneuk binoe sinan dalam broh
Hinan seumajoh pue-pue nyang hawa
Tapula ubi golom troh tanggoh
Kalheuh dijak kueh peureudei jiba
Pade tatabu keu bu ta pajoh
Troh bangsa tikoh ka jijak seuba
Kalheuh dijak kueh peureudei jiba
Pade tatabu keu bu ta pajoh
Troh bangsa tikoh ka jijak seuba
Leupah sengsara menyoe na tikoh
Habeh ji sampoh jagong keupila
Harkat ta udep sabe hana troh
Tabiat tikoh lagei nyan rupa
Habeh ji sampoh jagong keupila
Harkat ta udep sabe hana troh
Tabiat tikoh lagei nyan rupa
Jino hai abu jipeugah katroh
Rame dum tikoh yang troek di lua
Jicok hareukat bak luwah lampoh
Ka jak peuroh bak peutron keunira
Rame dum tikoh yang troek di lua
Jicok hareukat bak luwah lampoh
Ka jak peuroh bak peutron keunira
Hak Aneuk yatim jitem jak sampoh
Jitem jak pajoh hak inong janda
wahe ulama neu mat peujampoh
Bagah neu paroh tikoh bek lee na
Jitem jak pajoh hak inong janda
wahe ulama neu mat peujampoh
Bagah neu paroh tikoh bek lee na
Menyoe teulat neumat peujampoh
Geutanyoe kiroeh sama sibangsa
Saweub diadu tanyoe meu soh-soh
Nyan cara tikoh bak reubot kuasa
Geutanyoe kiroeh sama sibangsa
Saweub diadu tanyoe meu soh-soh
Nyan cara tikoh bak reubot kuasa
Kadang e teungku neujak u lampoh
Meureumpok tikoh neuturi hana
Neu eu peulandok neupeugah tikoh
Mungken syit lapoh sisat lam paya
Meureumpok tikoh neuturi hana
Neu eu peulandok neupeugah tikoh
Mungken syit lapoh sisat lam paya
Ulee ji tincu iku ji haloh
Bulei bak tuboh rapoh lagoina
Misei ji panyang bagah that duroh
Tanda nyan tikoh bek na le dawa
Bulei bak tuboh rapoh lagoina
Misei ji panyang bagah that duroh
Tanda nyan tikoh bek na le dawa
Gigoe ji blah keu tajam dua boh
Bagah bak jikoh makanan raya
Punyueng ji rayeuk ruhueng diteungoh
Mangat bagah troh info bahaya
Bagah bak jikoh makanan raya
Punyueng ji rayeuk ruhueng diteungoh
Mangat bagah troh info bahaya
Neujak u Calang bak Gureutei neupiyoh
Troh u Meulaboh uroe ka Asa
Bek bi jabatan keu bangsa tikoh
Habeh ji pajoh harta neugara
Troh u Meulaboh uroe ka Asa
Bek bi jabatan keu bangsa tikoh
Habeh ji pajoh harta neugara
di Glee Maheng Ureung meulampoh
ateuh gunong goh ureung meu rusa
Hai bansa aceh bu teugoeh teugoeh
nyan perte tikoh neulet u lua
ateuh gunong goh ureung meu rusa
Hai bansa aceh bu teugoeh teugoeh
nyan perte tikoh neulet u lua
meu macam bagou Cara let tikoh
racon jeut neuboh tikoh neu tuba
neu boh peurangkap tikoh mangat roh
mangat bek kiroh ngat senang bansa
racon jeut neuboh tikoh neu tuba
neu boh peurangkap tikoh mangat roh
mangat bek kiroh ngat senang bansa
Istana beugleh bek le na tikoh
tikoh neu paroh dalam peunjara
ngat seunang rakyat ekonomi leumoh
Bek sabe meh moh lagei yang ka ka
tikoh neu paroh dalam peunjara
ngat seunang rakyat ekonomi leumoh
Bek sabe meh moh lagei yang ka ka
Angen sinja jipot u Meulaboh
Wate oh beungoh jipot u Banda
Mumada ohnoe hikayat tikoh
Haba ka putoh malam ka jula.
Wate oh beungoh jipot u Banda
Mumada ohnoe hikayat tikoh
Haba ka putoh malam ka jula.
